KTZ Express TRANSESTONIA 2020 халықаралық көлік конференциясына қатысты
.png&w=2048&q=75)
Ағымдағы жылдың 13-14 мамырында Қытайдан Швецияға «Солтүстік жол» дәлізін дамыту тақырыбына арналған TRANSESTONIA 2020 11-ші халықаралық көлік конференциясы онлайн-форматта өтті.
Биылғы веб-конференция форматындағы іс-шараға Қазақстан Республикасы Индустрия және инфрақұрылымдық даму министрлігінің, Ресей Федерациясының Көлік министрлігінің, Эстонияның Экономика және коммуникациялар министрлігінің, «ҚТЖ» ҰК» АҚ, «KTZ Express» АҚ, «Ресей темір жолдары» АҚ, Таллин портының өкілдері қатысты.
Конференцияның басты мақсаты - Қазақстан, Ресей және Эстония аумақтары арқылы Қытай мен Швеция арасындағы көлікті одан әрі дамыту туралы келісімдерді талқылау және қол жеткізу.
Норвегия, Швеция және Эстониядағы коронавирустық пандемияның таралуы онлайн талқылаудың негізгі тақырыбы болды. Қатысушылар экономиканың түрлі салаларындағы қолайсыз өзгерістерді күтуде.
Бұл жағдайда Қытай мен Швеция арасында жылдамдығы жоғары контейнерлік пойыз қызметтерін іске қосу маңызды рөл атқаратыны анық.
Іс-шараға қатысушылар теңіз және әуе тасымалдарының шектеулі мүмкіндіктерін ескере отырып, Қытай мен Швеция арасындағы контейнерлік пойыздардың жылдам жүретін байланысын іске қосу басты міндеттердің бірі болады деп санайды.
«KTZ Express» АҚ басшысы өз сөзінде Қазақстанның ерекше географиялық жағдайға ие екендігін атап өтті: құрлық және теңіз жолында жеті мемлекетпен шекаралас. Әлемдегі эпидемиологиялық жағдайға қарамастан, 2020 жылдың 4 айында Қазақстан аумағы арқылы транзиттік контейнерлік тасымалдың өсуі 2019 жылдың сәйкес кезеңімен салыстырғанда 29%-ды құрады.
«Қазақстан арқылы өтетін маршруттарда кешенді қызмет көрсетумен және барлық қажетті санитарлық-эпидемиологиялық стандарттарға сәйкес келетін жүк ағынын қабылдау және күту үшін барлық жағдай жасалған. Біз ынтымақтастық пен бірлескен жобаларға қатысуға дайынбыз», - деді Д. Абдулаев.