KTZ Express TransLogistica Kazakhstan 2025 көрмесіне қатысты

📍 «Атакент» КДЦС, Алматы қ.

📅 2025 жылғы 30 қыркүйек – 2 қазан

TransLogistica Kazakhstan – Қазақстан мен Орталық Азиядағы негізгі салалық алаң болып табылады. Ол жыл сайын көлік және логистика саласының жетекші компанияларын біріктіреді. 2025 жылы көрмеге 20-дан астам елден 200-ден астам компания қатысты, ал Латвия, Литва және Эстония ұлттық стендтерін ұсынды.

KTZ Express көрмеге «Қазақстан темір жолы» ҰК» АҚ компаниялар тобының экспозициясы құрамында қатысып, халықаралық логистика, теміржол тасымалдары және көлік инфрақұрылымын дамытудағы жетістіктерін көрсетті. Компания цифрлық инновацияларға ерекше назар аударып, қонақтарға бірыңғай цифрлық терезе мүмкіндіктері мен жасанды интеллектті пайдалану мысалдарын ұсынды.

Салтанатты ашылу рәсімі 30 қыркүйекте мемлекеттік органдар, іскерлік қауымдастық және KTZ Express басшылығының қатысуымен өтті.

Екі күн бойы мазмұнды іскерлік бағдарлама ұсынылды:

• IV «Қазақстандағы қоймалық логистика нарығы» конференциясы — инвестициялар, технологиялар, цифрландыру және экологиялық шешімдер;
• II BreakBulk Kazakhstan конференциясы — ірі габаритті және ауыр жүктерді тасымалдау, инфрақұрылым және халықаралық дәліздер.

2 қазанда бағдарлама EXPERT TALKS аясындағы сараптамалық пікірталастар сериясымен аяқталады. Онда Қазақстан көлік аптасының қорытындылары шығарылып, саланың болашағы талқыланады.

Көрме көлік пен қоймалық логистикаға арналған шешімдердің кең ауқымын ұсынып, мамандарға серіктестермен байланыс орнатып, жабдықтау тізбегін оңтайландыруға мүмкіндік берді.